XOGANDO E APRENDO COAS LETRAS DOS NOSOS NOMES

COMO SABER A PRIMEIRA HORA QUEN É O REI OU RAÍÑA DA COLMEA?

Se entrades na nosa aula a primeira hora e tedes curiosidade por saber quen é o rei ou raíña ese día agora poñévolo moi sinxelo, pois terán variña e antenas.
Hoxe foi a quenda de Roque, que o fixo xenial!

E iso que aumentamos un pouquiño as súas tarefas, xa que nunha caixiña apareceron os nosos nomes impresos en folios de cores segundo os equipos de cores da clase.
Así, o rei tiña que sacar da caixiña os nomes dunha cor e chamar a levantarse aos seus membros. Por exemplo: equipo amarelo arriba.
Vendo nas tarxetas e os nenos e nenas dos que poderían ser (están de pe) irá repartíndolles a cada un a súa tarxeta para que a peguen no seu lugar correspondente da foto de grupo xigante.
Deste xeito, iremos familiarizándonos con tódalas letras e con todos os nomes dos compañeiros e compañeiras. Temos que estar sempre atent@s para facelo superben o día que nos toque ser reis da colmea.

QUEREDES UNHA PULSEIRA CO VOSO NOME?

Esa foi unha das propostas de hoxe nos recunchos. Aínda que só pasaron uns pouquiños nen@s por el, case todos os que o fixeron conseguiron superar a proba e levarse a súa pulseiriña personalizada.
Os que non o fixeron ou conseguiron hoxe, xa o irán facendo no tempo de actividade nos recunchos /ambientes da aula.

Motricidade fina, letras e xogo son os compoñentes esencias desta actividade.

COÑECESME NAS FOTOS? SABES CAL É O MEU NOME?

Hoxe estivemos poñendo a proba que nomes coñecemos dos compañeiros e compañeiras da nosa clase.
Nunha ficha cos nomes de tódolos ne@s da clase das abelliñas, e fotos de cada un  de nós colocadas en pratiños... o que facíamos era mirar a ver se recoñecíamos algún, buscar a foto e pegarlla ao lado; ou senón coller unha foto e con algunha pista (empeza coa mesma letra que..., ten só 3 letras...) buscar o seu nome.
Por suposto o primeiro que atopábamos era o noso!!!

Algúns fixemos pouquiños, outros moitas... cada un ao seu ritmo, pero pouco a pouco incorporando novos coñecementos do mundo das letras.

GÚSTANOS APRENDER, E GÚSTANOS XOGAR

Neste caso volvimos a utilizar o xogo das fotos e as tarxetas con nomes, que xa vos ensináramos, pero cambiamos un pouquiño a súa colocación.

Neste caso, estaban previamente colocadas as fotos, e de dous en dous ou de tres en tres, tiñan que atopar a tarxeta co seu nome e colocala debaixo da súa foto, así ata completar a rosca.

Como hai algún peque que aínda "se lía" para identificar o seu nome propio, este é un xeito de reforzar.

Xa víchedes o sinxelo que é, agora... podedes poñelo en práctica se vos apetece na casa.

XOGAMOS COS NOSOS NOMES

Un xogo en gran grupo que logo transformamos a pequeno grupo e individual, foi o xogo de emparellar as fotos dos peques da aula cos seus nomes.

Tamén buscamos a nosa propia foto e o nome.

Pouco a pouco iremos avanzando e recoñeceremos tódolos nomes nun plis plas, de momento só nos soan algúns, pero cada vez o facemos máis rápido.

Mirade que ben o pasamos!

Así de sinxelo poderedes facer vós tamén o xogo na casa, con só utilizar unhas fotos e os nomes dos familiares. Seguro que lles encantará xogar con vós!

Máis adiante poderíase facer con todo tipo de temáticas: animais, cores... o que se vos ocorra.

Se decidides facelo... contádenos que tal resultou, vale?

ESPAZOS E NOMES PROPIOS

Paréceme fundamental para sentirse cómodo nun sitio no que hai que compartir o espazo con outras 23 persoiñas, que cada un teña alomenos un espazo propio.

Dende principio de curso xa tiveron algúns: os percheiros onde colgan a súa roupa; as gavetas onde gardan os seus traballiños e tamén un lugar determinado para sentarse nas mesas.

Os percheiros e as gavetas mantémolas como lugar propio, pero o das mesas cambiámolo.

Agora na aula hai 4 equipos: 

- AMARELO

- VERDE

- ROSA

- AZUL

Estes equipos correspondense co reparto inicial de gavetas que fixen en setembro, e de acordo as cores que tiñan as caixiñas onde gardan os traballos, así quedaron os grupos.

Non quere dicir isto que vaian a estar sempre xuntos neses equipos, nin que se teñan que sentar cos do seu equipo... Non!!!! Todo o contrario, deben cambiar de sitio, falar con tódolos compañeiros, compartir xogos cuns nen@s, merendas con outr@s... e así interrelacionarse entre eles pero sen facer "piña" só con un ou dous nen@s. Somos un equipo " o das abelliñas", e os equipos de cores nos serven para sentir "pertenza" a outro sub-grupo, para aprender a colaborar cando haxa unha actividade por equipos; pero sobre todo para a hora  de ordear materiais, e de vestirnos para sair, coller mochilas... así que poderíase dicir que ten un papel organizativo.

Cada nen@ ten unha pulseira propia, co seu nome e a cor do seu equipo, que o identificará dentro da aula. A rutina de coller cada un a súa pulseira fará que pouco a pouco vaian recoñecendo e lendo os nomes de tódolos compañeir@s. Así mesmo, hai que gardalas cada día nun lugar determinado... polo que é outra rutina básica de orde dentro da aula.

Ademais, creamos outro lugar propio, que estará dentro do "ambiente de letras" e que é unha caixiña organizadora na que cada un ten "O SEU PROPIO TATU". Con estes tatus poderán asinar traballos, utilizalos como base se precisan copiar o nome, xogar a tatuar os nomes dos compañeiros e compañeiras... e así pouco a pouco avanzar no que a lectoescritura se refire.